Tensione janë shënuar mbrëmjen e kësaj të diele në Vlorë, gjatë protestës për mungesën prej disa ditësh të ujit të pijshëm, protestë e cila ndërpreu mbrëmjen gala festive të organizuar nga Bashkia e Vlorës në ambientet e Teatrit “Petro Marko”.

Në pamje shihet momenti kur një prej qytetarëve protestues shoqërohet me forcë nga disa efektivë të policisë, teksa ndodhej brenda teatrit. Sipas raportimeve, përveç personit që shfaqet në video, policia ka shoqëruar edhe disa protestues të tjerë, ndërsa situata mes forcave të rendit dhe qytetarëve ka qenë e tensionuar.

Protestuesit u futën në ambientet e teatrit për të shprehur indinjatën e tyre, duke e konsideruar të papranueshme faktin që, ndërkohë që qyteti po përballet prej ditësh me mungesën e ujit të pijshëm, Bashkia organizon evente festive luksoze për fundvitin.

Siç raportohet, forcat e policisë janë futur brenda Teatrit “Petro Marko” për të nxjerrë protestuesit jashtë, çka ka sjellë përplasje verbale dhe shoqërimin e disa personave.

Kujtojmë se më herët qindra qytetarë u grumbulluan para teatrit, duke brohoritur me thirrje si “Duam ujë” dhe “Poshtë qeveria”, ndërsa kërkonin që kryetarja e bashkisë të dilte dhe t’u jepte shpjegime për situatën e furnizimit me ujë.

Qytetarët kanë paralajmëruar se do të rikthehen sërish në protestë paraditen e së hënës para Bashkisë së Vlorës, nëse nuk ka reagim dhe zgjidhje për furnizimin me ujë të pijshëm.