Detaje të reja janë zbardhur lidhur me rastin e rëndë që tronditi Tiranën, ku një shtetase e huaj 20-vjeçare është arr estuar, e dyshuar për veprën penale “Vr asja e foshnjës”.

Burime pranë hetimit bëjnë me dije se e reja, e identifikuar si Ayu Putri, me shtetësi indoneziane, kishte ardhur në Shqipëri disa muaj më parë, së bashku me disa vajza të tjera, me të cilat banonte në një apartament me qira në kryeqytet. Të rejat ishin të punësuara si pastruese në biznese të ndryshme.

Nga verifikimet paraprake rezulton se 20-vjeçarja ka qenë shtatzënë rreth pesë muaj në momentin e mbërritjes në Shqipëri. Rreth dy muaj më parë, ajo ka sjellë në jetë foshnjën, e cila dyshohet se më pas është lënë e braktisur në ballkonin e banesës ku jetonte.

Hetimet kanë evidentuar se gjatë muajve të fundit të shtatzënisë, e reja ka kaluar episode të forta stresi dhe gjendje të rënduar psikologjike, elemente që po analizohen nga organet hetimore.

Pas lindjes, shoqet e saj kanë konstatuar situatën dhe kanë njoftuar pronarin e apartamentit, i cili më pas ka lajmëruar menjëherë autoritetet. Foshnja është transportuar me urgjencë drejt spitalit, por, pavarësisht përpjekjeve të stafit mjekësor, nuk ka arritur të mbijetojë.

Fillimisht, për shkak të rrethanave të rastit dhe gjendjes së nënës, procedimi penal ishte ndjekur në gjendje të lirë. Megjithatë, pas vlerësimit të akteve dhe vendimit të Gjykatës, është lëshuar urdhri i ndalimit, i cili është ekzekutuar nga Komisariati i Policisë Nr. 1 në Tiranë.

Materialet procedurale i janë referuar Prokurorisë, ndërsa hetimet vijojnë për zbardhjen e plotë të rrethanave dhe përgjegjësive në këtë ngjarje të rëndë.