Një udhëtim i qetë familjar u shndërrua papritur në një përvojë të frikshme për një familje, pasi gjatë qëndrimit në një bujtinë të vogël (B&B) zbuluan një pikturë që u ngjante në mënyrë shqetësuese djalit të tyre.

Familja, e cila ishte shpërngulur nga Britania e Madhe në Suedi dy vite më parë, po kthehej në shtëpi pas pushimeve dimërore në ski dhe kishte nevojë për një ndalesë gjatë rrugës së gjatë. Nëna e familjes, Jennie Stevenson, tregoi se zgjodhën një B&B të izoluar për të kaluar natën dhe për të pushuar pak.

Por gjumi duket se nuk ishte aspak i qetë.

Teksa po përgatiteshin për të ngrënë darkë në sallën e përbashkët, vajza e saj vuri re diçka të pazakontë.
“Vajza ime tha: ‘Mami, ka një pikturë të Barneyn në mur’”, kujton Jennie.

Kur iu afrua për ta parë më nga afër, nëna e tre fëmijëve mbeti e shtangur. Piktura paraqiste një fëmijë që i ngjante pothuajse në mënyrë identike djalit të saj shtatëvjeçar. Ajo e përshkroi momentin si “jashtëzakonisht shqetësues” dhe familja u ndje e tronditur.

Vepra artistike, me titullin “Lulet në livadh”, është realizuar nga piktori suedez Carl Larsson dhe paraqet një vajzë të vogël me kapele, e rrethuar nga lule. Ngjashmëria me djalin e familjes ishte e habitshme, përjashtuar faktin se figura kishte flokë të gjata.

Megjithatë, prindërit nuk u frikësuan deri në ekstrem, ndërsa vetë Barney e mori situatën me humor. Ata e përshkruan bujtinën si “të vjetër dhe tradicionale”, me “dysheme që kërciste”.

Jennie tregoi se gjatë natës u zgjua nga një zhurmë e frikshme, që i ngjante shushurimës së letrave ose përzierjes së letrave të bixhozit.
“Por ia dolëm të gjithë”, tha ajo me ironi.

Duke rrëfyer historinë në rrjetet sociale, Jennie shkroi:
“Sapo mbërritëm në këtë B&B rural dhe të izoluar, për të gjetur një pikturë ku fëmija ynë më i vogël paraqitet si vajzë. Nuk ka asnjë precedent të frikshëm për këtë… kështu që ndoshta është gjithçka në rregull.”

Komentuesit në rrjet nuk vonuan me teoritë e tyre. Njëri sugjeroi se zhurma mund të ishte “fëmija që përpiqej të dilte nga piktura”, ndërsa një tjetër pyeti nëse kishte “shtriga aty pranë”.

Jennie u përgjigj me humor të zi:
“Në Suedi, gjatë Pashkëve, shtrigat fluturojnë drejt Malit Blu… kështu që po, me shumë gjasa ka.”