Berlini rrit gatishmërinë ushtarake, rregulla të reja për lëvizjen jashtë vendit

Teksa konfliktet ndërkombëtare po përshkallëzohen, Gjermania po ndërmerr masa të reja për të forcuar kapacitetet e saj ushtarake, duke zgjeruar njëkohësisht kontrollin mbi qytetarët në moshë rekrutimi.

Sipas “Berliner Zeitung”, nga një vendim i hyrë në fuqi në janar 2026, burrat e moshës 17 deri në 45 vjeç që planifikojnë të qëndrojnë jashtë vendit për më shumë se tre muaj duhet të marrin autorizim paraprak nga Bundeswehr, një ndryshim që vjen në kuadër të reformës së re të shërbimit ushtarak.

Masa vjen në një moment kur arkitektura e sigurisë në Evropë është tronditur nga lufta e Rusisë në Ukrainë, e cila ka detyruar Berlinin të rishikojë strategjinë e tij të mbrojtjes dhe të rrisë investimet ushtarake në mënyrë të ndjeshme.

Në të njëjtën kohë, përshkallëzimi i konfliktit mes SHBA-së, Izraelit dhe Iranit ka krijuar një krizë më të gjerë rajonale dhe globale, me pasoja për sigurinë dhe ekonominë ndërkombëtare, përfshirë tregjet e energjisë dhe stabilitetin e rajonit të Gjirit.

Në këtë kontekst, autoritetet gjermane argumentojnë se ndryshimet ligjore synojnë krijimin e një regjistri të saktë të personave që mund të mobilizohen në rast emergjence, përfshirë ata që ndodhen jashtë vendit.

Ndryshe nga e kaluara, kur kufizime të tilla aplikoheshin vetëm në raste të jashtëzakonshme si gjendje lufte, rregullat e reja zbatohen edhe në kohë paqeje, duke reflektuar një ndryshim më të gjerë në politikën e sigurisë së Gjermanisë.

Qeveria synon gjithashtu të rrisë ndjeshëm numrin e trupave në vitet e ardhshme, si pjesë e një transformimi më të gjerë të Bundeswehr-it dhe rolit të Gjermanisë në NATO.

Megjithatë, masa ka nxitur debat në vend, me kritika që paralajmërojnë për ndikimin në liritë individuale dhe për një zhvendosje graduale drejt një modeli më të fortë mobilizimi ushtarak.

Zhvillimet tregojnë se, në një klimë ku konfliktet po shtrihen nga Ukraina në Lindjen e Mesme, edhe vendet evropiane po përshtatin politikat e tyre të sigurisë, duke u përgatitur për skenarë që deri pak vite më parë konsideroheshin të pamundur. /Pamfleti