Që prej eliminimit të saj të shtunën mbrëma në gjysmëfinalen e “Big Brother VIP Albania”, mbështetja për Brikena Selmanin ka qenë jo vetëm masive, por edhe e pandalshme në çdo platformë ku publiku ka pasur mundësi të shprehë opinionin e tij.

Reagimet e shumta në rrjetet sociale, komentet pozitive dhe mesazhet e dashurisë tregojnë qartë se ajo ka krijuar një lidhje të fortë me audiencën gjatë gjithë rrugëtimit të saj në këtë format shumë të ndjekur.

Për një pjesë të madhe të publikut dhe ndjekësve besnikë të spektaklit, Brikena e meritonte plotësisht një vend në finalen e madhe. Shumë prej tyre e konsiderojnë eliminimin e saj si të padrejtë, duke theksuar se ajo ka qenë një ndër banoret më të denja dhe më autentike të këtij edicioni.

Gjatë gjithë kohës së saj në shtëpinë më të famshme në Shqipëri, Briki u dallua për kulturën, qetësinë dhe elegancën që reflektonte në çdo situatë.

Ajo përfaqësoi një model pozitiv, duke treguar se si mund të ruhet dinjiteti dhe respekti edhe në një ambient me presion të lartë emocional. Pikërisht këto cilësi e bënë atë të fitojë simpatinë e publikut, duke lënë pas një imazh shumë të mirë.

Ky vlerësim i madh nga publiku nuk mbeti vetëm në fjalë. Dashuria e njerëzve u reflektua menjëherë në rrjetet sociale, ku Brikena përjetoi një rritje të jashtëzakonshme të ndjekësve.

Në momentin e eliminimit, ajo kishte rreth 298 mijë ndjekës, ndërsa brenda një kohe shumë të shkurtër ky numër u rrit në 344 mijë.

Kjo rritje rekord është një dëshmi e qartë e ndikimit që ajo pati tek publiku. Edhe pse rrugëtimi i saj drejt çmimit të madh përfundoi në gjysmëfinale, Brikena Selmani arriti të fitojë diçka po aq të rëndësishme: zemrat dhe mbështetjen e mijëra njerëzve, duke u kthyer në një nga figurat më të dashura të këtij sezoni.