Me kërkesë të Prokurorisë pranë Gjykatës së Shkallës së Parë të Juridiksionit të Përgjithshëm Tiranë, është arrestuar Gjergji Fela, 50 vjeç, nën akuzën për krijimin e një skeme mashtruese fiskale që ka shkaktuar dëme të mëdha në buxhetin e shtetit.

Ai akuzohet për veprat penale “Krijimi i skemave mashtruese lidhur me tatimin mbi vlerën e shtuar (TVSH)” dhe “Fshehje e të ardhurave”, sipas nenit 144/a dhe 180 të Kodit Penal.

Sipas hetimeve të kryera në kuadër të procedimit penal nr. 5787 të vitit 2024, në bashkëpunim me Drejtorinë e Hetimit Tatimor dhe Seksionin e Krimit Ekonomik, është zbuluar se subjekti tregtar “Dorina Fela” ka realizuar shitje fiktive me një vlerë totale prej 149,875,867 lekë. Kjo veprimtari ka sjellë një dëm prej 62,670,861 lekë për buxhetin e shtetit.

Prokuroria ka përmendur se veprimet janë kryer përmes deklaratave të pavërteta dhe faturave fiktive, me qëllim përfitimin të padrejtë nga kreditimi i TVSH-së dhe uljen e bazës tatimore për tatimin mbi fitimin, duke dëmnuar interesat financiare të shtetit.

Fela dyshohet se kishte rol organizues dhe drejtues në këtë aktivitet ilegal, duke përdorur subjektin tregtar në emër të bashkëshortes së tij për realizimin e skemës.

Hetimet vazhdojnë për të identifikuar të tjerë individë të përfshirë në këtë skemë dhe për të dokumentuar plotësisht impaktin financiar të saj. Kjo çështje hedh dritë mbi praktikat mashtruese në fushën e tatimeve dhe rëndësinë e mbikëqyrjes të rreptë nga autoritetet për të siguruar të ardhurat e shtetit