Një shtetas shqiptar me mbiemrin Berisha, i njohur edhe si “Vinny Berisha”, del i përfshirë në dosjet e publikuara së fundmi që lidhen me pedofilin e dënuar Jeffrey Epstein.

Sipas dokumenteve të siguruara, emri i Berishës figuron në të paktën 43 materiale që përfshijnë letra, email-e dhe fletë shkrimi dore. Në komunikimet e publikuara, ai duket i përfshirë në organizimin e disa punimeve ndërtimore në rezidencën luksoze të Epstein në Manhattan.

Bisedat datojnë nga 3 tetor 2018 deri më 15 shkurt 2019. Gjatë kësaj periudhe, Berisha shkëmben email-e me disa persona të lidhur me Epstein, ku diskutohet për rinovimin e një dhome masazhi, ndërtimin e një sauna, rregullimin e “master bathroom” dhe punime të tjera ndërtimi brenda rezidencës private.

Në komunikime, Berisha prezantohet si pronar kompanie ndërtimi dhe negocion ofertat financiare për projektet. Përmenden edhe emra të tjerë si Richard Kahn, David Mitchell, Merwin Dela Cruz dhe Karyna Shuliak, të cilët shfaqen si ndërmjetës ose koordinues të projektit.

Sipas dokumenteve, Lesley Groff, asistente personale e Epstein, caktoi një takim për Berishën më 1 shkurt 2019, në orën 15:15, në rezidencën e Epstein në Manhattan. Email-i konfirmon se shqiptari do të pritej personalisht në pronën private. Pas këtij komunikimi, Berisha dërgon ofertën dhe pamjet ilustruese të projektit, duke sugjeruar se Epstein kishte dhënë miratimin paraprak. Megjithatë, nuk ka të dhëna të qarta nëse takimi u zhvillua dhe nëse punimet u kryen realisht.

Disa nga dokumentet përmbajnë edhe fletë me shkrim dore, ku figuron mbiemri i Berishës, por nuk dihet nëse janë shkruar nga Epstein apo persona të tjerë. Ky takim, nëse ka ndodhur, zhvillohet vetëm pesë muaj para arrestimit të Epstein dhe rreth gjashtë muaj para vdekjes së tij në burg, duke bërë që komunikimet të jenë në një nga periudhat më kritike të jetës së financierit të akuzuar për trafik seksual.

Rezidenca e Epstein në Manhattan, një nga vendet kryesore të abuzimeve të tij, ka përfunduar së fundmi një rinovim masiv, duke u kthyer në një nga pronat më të shtrenjta të zonës Upper East Side. Një nga viktimat e Epstein ka rrëfyer publikisht tmerrin që ka përjetuar brenda këtyre mureve, duke e përshkruar ambientin si një “burg luksoz të abuzimit”.

Sipas dokumenteve, V. Berisha shfaqet si kontraktor ndërtimi që ka negociuar oferta, ka dërguar projekte dhe ka marrë një takim zyrtar në rezidencën e Epstein. Aktualisht nuk ka prova që ai të ketë pasur përfshirje në aktivitetet kriminale të Epstein, por fakti që emri i tij figuron në 43 dokumente dhe që kishte kontakte direkte me rrethin e ngushtë të tij shton misterin rreth personave që kanë pasur akses në botën private të një prej figurave më të errëta të historisë moderne amerikane.