Një vajzë nga Tirana i është drejtuar redaksisë së JOQ Albania për të denoncuar një situatë që, sipas saj, ka ndodhur gjatë udhëtimit me urbanin e Kamzës.

Në mesazhin e dërguar, ajo shprehet se një burrë rreth të 50-ave që ndodhej përpara saj ka kryer gjeste të papërshtatshme në publik, duke prekur zonën intime, çka, sipas pretendimit të saj, ka krijuar shqetësim për të dhe për pasagjerët përreth.

Ajo thekson se veprimet janë shoqëruar edhe me shikime të vazhdueshme dhe mimika që i ka konsideruar të papërshtatshme. Sipas saj, qëllimi i personit nuk ka qenë i rastësishëm.

Redaksia e JOQ Albania e ka pyetur qytetaren nëse ekziston mundësia që veprimi të ketë qenë i pavullnetshëm apo thjesht një reagim fizik i momentit, por ajo është shprehur e bindur se situata kishte natyrë të qëllimshme.

Në videon e dërguar nuk dallohet fytyra e personit, ndërsa pamjet tregojnë momentin kur ai prek zonën e tij intime. Megjithatë, JOQ Albania thekson se këto mbeten pretendime të denoncueses dhe nuk mund ta konfirmojë natyrën apo qëllimin e veprimit.

Raste të tilla, nëse vërtetohen, përbëjnë shqetësim për sigurinë dhe komoditetin e qytetarëve në transportin publik. Redaksia mbetet e hapur për çdo reagim apo sqarim nga personi i përfshirë apo nga autoritetet përkatëse.