Pamje dramatike po qarkullojnë në rrjetet sociale nga kryeqyteti iranian, Teherani, pasi sulmet izraelite ndaj objekteve të naftës kanë shkaktuar zjarre masive dhe një re të dendur tymi që ka mbuluar qytetin.

Sipas raportimeve, sulmet kanë goditur disa objekte të rëndësishme energjetike, përfshirë depon e naftës në Aghdasieh në verilindje të Teheranit, depozitën e naftës në Shahran në perëndim të kryeqytetit, si dhe një tjetër depo karburanti në qytetin Karaj. Ushtria izraelite konfirmoi se ka goditur objekte të ruajtjes së karburantit në Teheran, duke pretenduar se ato përdoreshin për infrastrukturë ushtarake.

Pas shpërthimeve, flakë të mëdha u ngritën në qiell ndërsa tymi i dendur u përhap mbi qytetin me më shumë se 10 milionë banorë, duke bllokuar rrezet e diellit. Banorët raportuan se gjatë mëngjesit u detyruan të ndiznin dritat në shtëpitë dhe bizneset e tyre për shkak të errësirës së krijuar nga tymi.

Sipas autoriteteve iraniane, zjarret nga karburanti i djegur kanë vazhduar për më shumë se 12 orë pas sulmeve. Guvernatori i Teheranit, Mohammad Sadegh Motamedian, deklaroi se shpërndarja e karburantit në kryeqytet është ndërprerë përkohësisht.

Banorë të shumtë kanë raportuar edhe një fenomen të pazakontë: “shi të zi dhe me vaj”, ndërsa autoritetet kanë paralajmëruar për rrezikun e reshjeve acidike dhe ndotjes së rëndë të ajrit.

Shoqëria e Gjysmëhënës së Kuqe iraniane bëri të ditur se në ajër janë çliruar sasi të konsiderueshme hidrokarburesh toksike, okside squfuri dhe azoti, të cilat mund të shkaktojnë probleme në frymëmarrje dhe irritim të syve.

Ndërkohë, forcat e sigurisë në rrugët e Teheranit janë parë duke drejtuar trafikun të pajisura me maska dhe veshje mbrojtëse, ndërsa qytetarëve u është kërkuar të qëndrojnë brenda shtëpive për të shmangur ekspozimin ndaj tymrave toksikë.

Nga ana tjetër, zëdhënësi i Ministrisë së Jashtme iraniane, Esmaeil Baqaei, i dënoi sulmet e SHBA-së dhe Izraelit ndaj objekteve të naftës, duke deklaruar se ato e kanë shtyrë konfliktin në një “fazë shumë të rrezikshme.”