Gjesti i tij vetëmohues nuk u shpërblye ashtu siç prisnin shumë. Në një kthesë vërtet të papritur të ngjarjeve, Akili është konkurrenti që ka lënë përfundimisht garën e “Ferma VIP 3” pas televotimit kokë më kokë me Fairfax.

Kjo dalje e tij merr një vëmendje edhe më të madhe dhe duket gati-gati si një lojë e hidhur e fatit (apo e “karmës”), për shkak të asaj që ndodhi vetëm pak më parë.

Kujtojmë se gjatë sfidës fizike deçizive, Akili, ndonëse e mbylli garën i pari, vendosi të mos i binte kambanës. Ai “dogji” veten me vetëdije të plotë vetëm për të shpëtuar Gresën, duke pranuar sfidën për të shkuar në nominim.

Ndonëse veprime të tilla altruiste zakonisht rrëmbejnë zemrat e publikut dhe shpërblehen me vota, këtë herë ndodhi e kundërta. Sakrifica e tij rezultoi fatale për rrugëtimin e tij televiziv.

Ky eliminim i papritur ka shokuar fermerët brenda shtëpisë, veçanërisht Gresën e cila po e vazhdon garën pikërisht falë tij.

Largimi i Akilit dëshmon edhe një herë se dinamikat e një reality show janë shpesh të pamëshirshme dhe se edhe gjestet më heroike ndonjëherë mund të kthehen në bumerang.