Mbrëmja e kësaj të premteje në “Ferma VIP 3” nisi me tension dhe një situatë krejt të papritur. Gjatë lidhjes live me moderatoren Arbana Osmani, Ermiona Lekbello deklaroi se dëshiron të tërhiqet menjëherë nga gara.

Ajo u shfaq e ngarkuar emocionalisht, duke theksuar se klima mes fermerëve është bërë e papërballueshme për të. Sipas saj, energjia negative, ngacmimet dhe sjelljet e papërshtatshme kanë ndikuar drejtpërdrejt në gjendjen e saj.

“Nuk ndihem mirë këtu. Ka një atmosferë që nuk më bën mirë dhe nuk mund të vazhdoj më gjatë,” u shpreh Lekbello, duke shtuar se situata e krijuar i ka shkaktuar një ndjesi të fortë shqetësimi.

E surprizuar nga deklarata, Arbana Osmani ndërhyri duke i kërkuar të mos marrë një vendim të menjëhershëm.

Moderatorja theksoi se, duke qenë se Ermiona është pjesë e televotimit, është e rëndësishme të pritet rezultati në respekt të publikut që ka votuar.

Pas kësaj, Lekbello pranoi të qëndrojë deri në shpalljen e vendimit, duke nënvizuar se hyrja e saj në spektakël ka qenë pikërisht për publikun.

Situata mbetet e hapur dhe pritet të shihet nëse Ermiona do ta mbajë vendimin për t’u larguar pas rezultatit të televotimit.