Drama e arrestimit të reperit Gjesti (Besart Kelmendi) ka kaluar tashmë në dyert e drejtësisë.

Ditën e sotme (të premte), është duke u zhvilluar seanca dëgjimore ndaj ish-banorit të “Big Brother VIP Kosova”, pas incidentit të rëndë me armë të ndodhur në zyrat e kompanisë “Onima”.

Mësohet se trupi gjykues ka vendosur që seanca të mbahet nën masa të rrepta dhe me dyer të mbyllura për publikun dhe mediat.

Nga pamjet e siguruara në ambientet e Pallatit të Drejtësisë, është parë të mbërrijë menaxheri i tij, Bonart Ajvazi, si dhe babai i reperit, Jetoni.

Megjithatë, ajo që ka rënë në sy ka qenë një vendim i papritur nga ana e gjykatës: babai i Gjestit nuk është lejuar të futet brenda në sallë për të ndjekur nga afër seancën e të birit.

Kujtojmë se Gjesti u vu në pranga më datë 11 Mars, pas një konflikti të agravuar për prishjen e kontratës menaxhuese.

Situata e tij ligjore paraqitet mjaft serioze, pasi Prokuroria Themelore në Prishtinë (Departamenti i Përgjithshëm) ka njoftuar se mbi artistin rëndojnë 3 akuza të forta penale:

“Mbajtja në pronësi, kontroll ose posedim të paautorizuar të armëve”
“Kanosja”
“Asgjësim apo dëmtimi i pasurisë”.

Tashmë pritet me interes të madh vendimi i gjykatës për masën e sigurisë që do t’i caktohet reperit pas kësaj ngjarjeje të bujshme.