Anulohet miqësorja Shqipëri U-21-Japoni e programuar për t’u zhvilluar në Antalia të Turqisë.

Kjo është miqësorja e dytë që anulohet pas asaj me SHBA-të. Takimi do luhej në fund të këtij muaji.

FSHF kishte bërë edhe posterin e takimit, ku njoftonte se më 27 mars, në Antalia, do mbahej përballja mes dy skuadrave të futbollit.

Departamenti i Komunikimit në FSHF bën me dije se “është anuluar edhe ndeshja miqësore mes Japonisë U-21 dhe Shqipërisë U-21, e planifikuar për t’u zhvilluar më 27 mars në Antalia, Turqi”.

Federata Japoneze e Futbollit ka njoftuar Federatën Shqiptare të Futbollit se, “për shkak të situatës së krijuar në Lindjen e Mesme dhe për arsye sigurie, ka vendosur të anulojë udhëtimin drejt Turqisë, duke bërë të pamundur zhvillimin e kësaj ndeshjeje miqësore”.

Pas anulimit të dy takimeve të planifikuara në Antalia, ndaj Shteteve të Bashkuara të Amerikës U-21 dhe Japonisë U-21, Federata Shqiptare e Futbollit është duke shqyrtuar mundësitë për të gjetur kundërshtarë të tjerë për Kombëtaren U-21 në të njëjtën periudhë.

FSHF njoftoi se “do të informojë në vijim për çdo zhvillim në lidhje me programin e ndeshjeve miqësore të Kombëtares U-21”.

Shkak është bërë pikërisht lufta në Lindjen e mesme dhe sulmet me dronë dhe raketa nga ana e Iranit ndaj vendeve të Gjirit, Qipros dhe deri Turqisë.