Ish-banorja e “Big Brother VIP 3”, Sara Gjordeni, vazhdon të mbetet e lidhur me dinamikat e shtëpisë më të famshme në Shqipëri, ndonëse tashmë e ndjek atë nga jashtë dhe e fokusuar tek angazhimet e saj të reja si nënë.

Së fundmi, gjatë një bashkëbisedimi virtual me ndjekësit në llogarinë e saj në Instagram, ajo ka treguar se cili është banori që ajo dëshiron të shohë si fitues në këtë edicion të pestë.

E pyetur nga një fans nëse e ndjek spektaklin dhe se kush mendon se do ta ngrejë kupën, Sara nuk ka ngurruar të japë një përgjigje të drejtpërdrejtë dhe mjaft surprizuese.

Fillimisht, ajo ka treguar me shaka se koha e saj për të ndjekur televizion është e kufizuar nga kujdesi për vajzën e saj të vogël dhe nga puna.

“E shoh kur më lë mistrecja dhe punët të qetë,” shkruan ajo, para se të zbulojë emrin e saj të preferuar për finalen e madhe.

“Për mua e meriton dhe e fiton Selin. Do kënaqem sa s’ka që më në fund të fitojë një vajzë e re,” ka shtuar ajo në postimin e saj në InstaStory.

Me këtë deklaratë të hapur, Sara e ka pozicionuar veten qartë si një mbështetëse të Selinës. Ajo ka theksuar dëshirën e saj të madhe që, pas disa sezonesh, të jetë pikërisht një vajzë e re ajo që triumfon dhe rrëmben çmimin e madh të “Big Brother VIP Albania”.