Një video e mbërritur së fundmi në redaksinë tonë përcjell një realitet sa të dhimbshëm, aq edhe alarmant për një nga qytetet më të rëndësishme bregdetare të Shqipërisë.

Pamjet e regjistruara në rrugët kryesore të Vlorës dëshmojnë më së miri atë që sociologët e quajnë “dimri demografik”, ku pesha e viteve rëndon mbi trotuaret që dikur gëlonin nga gjallëria e moshave të reja.

Qytetari që ka filmuar këto sekuenca e ka shoqëruar mesazhin e tij me fjalë që therrin në shpirt: “Një qytet me pleq dhe një rini që ka ikur pa kthim”.

Në video shihen qartë sheshet dhe rrugët e qytetit, ku në çdo stol, cep rruge apo lulishte, dominon prania e të moshuarve. Ata shihen duke biseduar me njëri-tjetrin apo duke ecur ngadalë, ndërsa mungesa e të rinjve është aq e dukshme sa krijon një ndjesi zbrazëtie të frikshme.

Pamjet dokumentojnë një Vlorë që duket se po plaket në vetmi, ku zhurma e fëmijëve dhe vrulli i rinisë janë zëvendësuar nga heshtja e atyre që kanë mbetur pas për të ruajtur shtëpitë e boshatisura.

Ky denoncim vjen si një pasqyrim i drejtpërdrejtë i plagës së emigrimit, e cila ka goditur rëndë jugun e vendit. Shifrat e larta të largimeve drejt Europës kanë bërë që qyteti i flamurit të humbasë forcën e tij më vitale, duke lënë pas një gjeneratë prindërish dhe gjyshërish që sytë i mbajnë vetëm nga telefonat për të komunikuar me fëmijët e tyre në rrugët e botës.