Një influencuese e vetëshpallur si mbështetëse e lëvizjes MAGA, e cila kishte grumbulluar miliona shikime në Instagram, është zbuluar se në fakt ishte një profil i rremë i krijuar me inteligjencë artificiale dhe i menaxhuar nga një student mjekësie nga India.

Sipas raportimeve të mediave ndërkombëtare, “Sam”, një 22-vjeçar që studion për kirurg ortoped, ka pranuar se krijoi dhe menaxhoi një llogari virtuale të një gruaje të re, të dizajnuar me AI, e cila postonte përmbajtje të orientuar drejt audiencës konservatore në SHBA.

Ai ka treguar se ideja lindi gjatë përpjekjeve për të fituar të ardhura dhe për të kursyer para për emigrim në Shtetet e Bashkuara pas diplomimit. Përmes mjeteve të inteligjencës artificiale, ai krijoi një figurë femërore tërheqëse, e cila paraqitej si infermiere dhe publikonte mesazhe politike dhe sociale që përputheshin me retorikën konservatore.

Llogaria, sipas tij, fitoi shpejt ndjekës dhe arriti mijëra abonentë brenda një kohe të shkurtër, duke gjeneruar të ardhura të konsiderueshme përmes platformave të ndryshme me pagesë dhe shitjes së përmbajtjes së gjeneruar nga AI.

Megjithatë, profili u hoq më pas nga Instagram për shkelje të rregullave dhe aktivitet mashtrues, pasi u zbulua natyra e tij artificiale.

Sam ka pranuar gjithashtu se përfitoi financiarisht nga skema, duke e përshkruar si një mënyrë të lehtë për të fituar para gjatë studimeve, ndërsa ka shprehur se tashmë synon të fokusohet në karrierën e tij mjekësore.