Një incident i rëndë është regjistruar në qytetin Culiacán në Meksikë, ku një grua 59-vjeçare është sulmuar nga një tufë e madhe bletësh afrikane.
Pamjet tregojnë momentin kur ajo rrethohet nga një numër i madh bletësh teksa ndodhej në rrugë. Për të përballuar situatën, gruaja është kapur pas një shtylle dhe ka qëndruar në këmbë, ndërsa insektet i mbuluan pjesën më të madhe të trupit.
Sipas raportimeve, ajo ka marrë mbi 200 pickime, por ka arritur të qëndrojë në këmbë deri në mbërritjen e ndihmës.
Në vendngjarje ndërhynë ekipet e emergjencës dhe Ushtria Meksikane, të cilët përdorën mjete speciale për të shpërndarë tufën dhe për të nxjerrë gruan nga rreziku.
Bletët afrikane njihen për agresivitetin e tyre dhe reagojnë në grup kur ndihen të kërcënuara, çka i bën sulmet e tilla veçanërisht të rrezikshme.
Gruaja është transportuar në spital dhe, sipas raportimeve paraprake, ndodhet jashtë rrezikut për jetën.
