Presidenti i Shteteve të Bashkuara, Donald Trump, deklaroi se “do të shpërthejnë shumë bomba” në Iran nëse nuk arrihet një marrëveshje deri të mërkurën në mbrëmje, kur skadon armëpushimi i arritur dy javë më parë.
Në një intervistë për PBS News, Trump u shpreh se nuk është i sigurt nëse Irani po merr ende pjesë në bisedimet në Pakistan.
“Duhet të jenë atje. Ne ramë dakord të jemi atje, edhe pse ata thonë se jo. Gjithçka ishte organizuar. Do të shohim nëse do të ndodhë. Nëse nuk janë atje, edhe kjo është në rregull”, citohet të ketë thënë ai.
Më herët, Trump kishte deklaruar se zëvendës presidenti i Shteteve të Bashkuara, JD Vance, ishte nisur drejt Islamabadit për të marrë pjesë në bisedime.
Ndërkohë, gazetarja Maria Bartiromo tha në Fox News se Trump i kishte deklaruar se “një marrëveshje do të nënshkruhet sonte”.
