Kryetari i Bashkisë së Rrogozhinës, Edison Memolla, është vetëdorëzuar në Policinë e Rrogozhinës, pasi u shpall fajtor për veprën penale të korrupsionit aktiv në zgjedhje, kryer në bashkëpunim.
Vendimi u dha nga Gjykata e Apelit të Posaçëm, e cila e dënoi Memollën me 1 vit burg. Po ashtu, si dënim plotësues, gjykata vendosi heqjen e së drejtës për të ushtruar funksione publike për një periudhë prej 5 vitesh.
Sipas Prokurorisë së Posaçme (SPAK), Memolla ka ndikuar te elektricisti Blerim Xhamani, me qëllim që ky i fundit të mos i ndërpriste energjinë elektrike një abonenteje debitore. Ky veprim, sipas akuzës, është kryer për të ndikuar në votën e saj në favor të Memollës, gjatë zgjedhjeve të pjesshme lokale të 6 marsit 2022.
Në atë kohë, Edison Memolla kandidonte për kryetar bashkie nën siglën e Partisë Socialiste. Vendimi i Apelit të Posaçëm është i formës së prerë.
