Me firmën e Drejtorit të Përgjithshëm të Policisë së Shtetit Skënder Hita, janë bërë lëvizje në disa prej drejtorive vendore në të gjithë vendin, duke prekur pozicione kyçe të strukturës drejtuese.

Gazetarja Xhensila Kodra, bëjnë me dije se Besmir Dervishi është larguar nga posti i zëvendësdrejtorit të Policisë së Tiranës dhe është emëruar shef i hetimit të krimeve në Kukës.

Në vend të tij është caktuar Oliger Torba, i cili më herët mbante detyrën e zv/drejtorit në Fier.

Në kuadër të këtyre lëvizjeve, është larguar edhe shefi i Komisariatit Nr. 2 në Tiranë, Ermal Kënaçi, i cili është transferuar në Kukës.

Gjithashtu Gent Ndoj, i cili ishte Drejtor për Hetimit e Krimit Financiar në Drejtorinë e Përgjithshme është transferuar në Dibër.

Ndryshime janë regjistruar edhe në disa qarqe të tjera, përfshirë Shkodrën, Lezhën dhe Fierin, ku janë rikonfiguruar pozicionet e nëndrejtorëve të drejtorive vendore.

Më herët kryepolici Hita ka emëruar Alban Dautajn në krye të Drejtorisë së Operacionales, pas shkarkimi të Melsi Koçit.

Kujtojmë se më herët Dautaj mbante detyrën e drejtorit të Antiterrorit, post të cilin Hita ia ka emëruar Edmond Sulës.