Një video tejet shqetësuese ka mbërritur në redaksinë e JOQ Albania, ku një i mitur shfaqet duke goditur nga pas me shuplakë një të moshuar, në një akt të rëndë dhune dhe mungese totale respekti ndaj moshës së tretë.

Pamjet, të cilat janë publikuar fillimisht në rrjetin social TikTok, janë dërguar në redaksinë tonë nga një qytetare e tronditur, e cila shprehet se ka mbetur e shokuar nga ajo që ka parë. Në video, i mituri duket se po merr pjesë në një “lojë” apo sfidë për rrjetet sociale, teksa një tjetër person e filmon momentin kur ai i afrohet një moshuari që po kalonte në rrugë, e godet befasisht me shuplakë dhe largohet me vrap.

Situata bëhet edhe më alarmante nga fakti se veprimi shoqërohet me humor banal dhe tallës, duke e trajtuar dhunën ndaj një të moshuari si argëtim dhe material për klikime. Në mbishkrimin e videos së publikuar në TikTok, autori ka shkruar: “Ajo: Kushedi me kë po më tradhton. Ndërkohë unë me çunat.”

Një tjetër element shqetësues lidhet me reagimet në rrjet. Referuar komenteve në postimin origjinal, i mituri që kryen veprimin identifikohet nga përdoruesit si “Dion”. Por ajo që trondit edhe më shumë është fakti se në komente mungon çdo formë denoncimi apo kritike, ndërsa shumica e reagimeve janë emoji duke qeshur dhe tallje, sikur dhuna ndaj një të moshuari të ishte një shaka.

Kjo video ngre alarmin për një fenomen gjithnjë e më shqetësues, ku të rinj apo të mitur dalin në rrugë dhe, për disa klikime apo pëlqime në rrjete sociale, kryejnë veprime të papranueshme, duke poshtëruar dhe dhunuar persona të pambrojtur, veçanërisht të moshuarit.

JOQ Albania e konsideron këtë rast tejet shqetësues dhe skandaloz, pasi dhuna ndaj moshës së tretë, qoftë edhe në formë “shakaje”, është e patolerueshme dhe duhet dënuar pa asnjë hezitim, si nga shoqëria, ashtu edhe nga institucionet përgjegjëse.

Redaksia jonë u bën thirrje autoriteteve përkatëse që të verifikojnë rastin dhe të marrin masa, ndërsa shoqëria duhet të reflektojë seriozisht për normalizimin e dhunës dhe talljes në rrjetet sociale.