Një situatë sa komike aq edhe problematike është regjistruar orët e fundit në rrugën që të dërgon drejt plazhit të Velipojës. Një qytetar ka dërguar pranë redaksisë së JOQ Albania pamjet ku shihen disa lopë që kanë “shpallur pavarësinë” në mes të asfaltit.

Siç shihet edhe nga video, kafshët nuk e kanë aspak me nxitim. Ato qëndrojnë të qeta duke bllokuar qarkullimin, ndërkohë që shoferët detyrohen të frenojnë dhe të presin derisa “zotërinjtë” e rrugës të vendosin se në cilin krah do të lëvizin.

“Policia e Shtetit na ka bërë postbllok. Ju lutem hapeni rrugën,” – dëgjohet të thotë me ironi qytetari që po nget makinën, ndërsa lopët vazhdojnë të qeta “shëtitjen” e tyre në muzg.

Përveç anës komike, ky mbetet një shqetësim serioz për sigurinë rrugore në këtë aks, sidomos gjatë natës ose në kushte me shikueshmëri të ulët.

Mungesa e ndriçimit: Në këtë aks, prezenca e kafshëve në rrugë mund të bëhet shkak për aksidente të rënda.

Papërgjegjshmëria: Pronarët e gjedhëve shpesh i lënë të lira pa asnjë mbikëqyrje, duke sfiduar rregullat e qarkullimit dhe sigurinë e udhëtarëve.

Nuk është hera e parë që në JOQ mbërrijnë denoncime të tilla nga zona e Shkodrës dhe Velipojës, ku duket se “semaforët” e vetëm që respektohen janë pikërisht këto takime të papritura me blegtorinë lokale.