Një rast i pazakontë është denoncuar në redaksinë e JOQ Albania nga një kamarier i një restoranti në Tiranë, i cili tregon se si ka rënë pre e një mashtrimi të thjeshtë, por shqetësues.

Sipas denoncimit, një klient është paraqitur në restorant, ka kërkuar menunë dhe ka treguar se do të festonin ditëlindjen e mbesës së tij.

Ai ka porositur një birrë dhe më pas i ka kërkuar kamarierit shumën prej 13 mijë lekësh, duke i thënë se do të shkonte në një pastiçeri aty pranë për të blerë tortën dhe se paratë t’i shtoheshin më pas faturës së restorantit.

Kamarieri, duke i besuar klientit, ia ka dhënë shumën e kërkuar. Por pas kësaj, personi është larguar nga ambientet e restorantit dhe nuk është kthyer më, ashtu siç dëshmohet dhe në pamjet e mbërritura në redaksinë tonë.

Ai i bën thirrje personit në fjalë që të kthejë menjëherë shumën e marrë, duke e paralajmëruar se, në të kundërt, do të përpiqet ta gjejë vetë për ta zgjidhur situatën.

“Ky personi erdhi në restorant dhe tha se do vinin për ditëlindjen e mbesës. Më kërkoi 13 mijë lekë që të merrte tortën dhe t’ja kaloja te fatura. Ia dhashë, por ai iku dhe nuk u kthye më. Ju lutem postojeni dhe i them atij zotërisë t’i sjellë menjëherë paratë, përndryshe do ta gjej vetë,” shprehet kamarieri.