Një i moshuar, i cili dyshohet se ka humbur dhe nuk mban mend asnjë informacion për veten apo familjarët, është gjetur pak minuta më parë në Tiranë nga një qytetar zemërmirë.

Sipas qytetarit që ka kontaktuar redaksinë e JOQ Albania, i moshuari është gjetur pranë zonës së Spitalit Ushtarak, në gjendje konfuzioni. Ai nuk kishte me vete as telefon dhe as dokumente identifikimi, ndërsa nuk ishte në gjendje të tregonte se nga vinte apo ku duhet të shkonte.

Gjatë një bisede me qytetarin, i moshuari ka thënë se quhet Shefqet Hasa, por ky emër nuk është i sigurt, pasi ai duket se vuan nga probleme të memories dhe nuk mban mend detaje të tjera për jetën e tij.

Duke parë gjendjen e tij dhe duke mos dashur ta lërë në rrugë, qytetari zemërmirë i ka paguar një natë qëndrimi në hotel, ku i moshuari ndodhet aktualisht. Ai është lënë të flejë aty për këtë natë te hotel ‘Kashari’, pranë zonës së Spitalit Ushtarak.

Qytetari shprehet se shqetësimi i tij kryesor është që familjarët e të moshuarit mund të jenë duke e kërkuar, ndaj ka kërkuar ndihmën e JOQ Albania për ta bërë rastin publik.

JOQ Albania u bën thirrje familjarëve, të afërmve apo kujtdo që e njeh këtë të moshuar, që nëse kanë informacion, të kontaktojnë menjëherë redaksinë tonë për të ndihmuar në kthimin e tij pranë familjes.

Çdo informacion mund të jetë vendimtar.