Nga Ministria e së Vërtetës.

Pas njëviti të mbushur me slogane, broshura dhe statistika optimiste, Ministria e Turizmit, Kulturës dhe Sporteve ka prezantuar një tjetër arritje “historike”. Këtë herë, suksesi nuk matet me netë qëndrimi apo euro të shpenzuara, por me lartësi artistike.

Në një performancë simbolike që sipas burimeve “përmbledh gjithë filozofinë qeverisëse”, ministri Blendi Gonxhja u shfaq duke ngritur kulturën shqiptare në ajër, në formën e një balerine që fluturon mbi realitetin ekonomik.

“Turizmin e çuam në qiell, tani është radha e artit,” – u shpreh ministri, ndërsa publiku përpiqej të kuptonte nëse bëhej fjalë për një shfaqje bashkëkohore apo për një konferencë shtypi alternative.

Sipas ministrisë, ky akt përfaqëson strategjinë e re kombëtare: më pak tokë nën këmbë, më shumë balet në ajër. Burime pranë institucionit sqarojnë se buxheti për kulturën mbetet i njëjtë, por tani do të “shpenzohet me elegancë”.

Ndërkohë, sporti pritet të trajtohet në fazën e tretë të reformës, ku sipas planeve paraprake, do të “mbartet mbi supe” nga entuziazmi, në mungesë të infrastrukturës.

Ministria konfirmon se performanca do të përsëritet në sezonin turistik, si atraksion i ri: “Shqipëria, vendi ku edhe premtimet ngrihen lart, të paktën për pak sekonda.”