Në këto ditë festash, kur gjithkush përpiqet të shtrojë një tryezë të bollshme, një vëmendje e shtuar po u kushtohet familjeve në nevojë.

Për të 10-in vit me radhë, në zonën veriore të Pukës, atje ku dhjetëra familje jetojnë në skamje, ka vijuar nisma vullnetare “Askush ndër ne pa festa”, ku emigranti Fran Gjoka, së bashku me gazetarin Armir Mehaj janë përpjekur të ngrohin zemrat e familjeve në nevojë, që gjithkush të përjetojë ditë më të gëzuara.

Për Fran Gjokën nisma dhuron gëzim për të dhe familjen e tij, teksa shpreson që çdo vit e më shumë të ketë më pak njerëz në vështirësi.

Paketa përbën shportën bazë të ushqimeve, fruta dhe perime, si dhe bakllavanë e festës, një simbol i solidaritetit, dhe një kujtesë që askush të mos humbasë shpresën për ditë më të mira.

Emigrimi masiv është shndërruar në problem madhor për shumë familje, ku gjen vetëm të moshuar, shumica e të cilëve në vështirësi ekonomike.

Nisma e bamirësisë në Pukë e Fushë-Arrëz është një traditë e veçantë që synon të nxisë kontributin e emigrantëve ne vendlindje, ashtu siç filantropi Fran Gjoka dhe të larguar të tjerë kanë vepruar prej 10 vitesh.